Երեխայի կղանքում արյան առկայությունը կարող է անհայտ պատճառներով լինել: Սովորաբար, եթե երեխան իրեն լավ է զգում և նորմալ աճում է, կղանքում արյան առկայության հարցը ինքնիրեն լուծվում է: Սակայն կարևոր է, որ դուք դրա մասին տեղյակ պահեք երեխայի մանկաբույժին:
Արյան գույնը հուշում է, թե որտեղ է արնահոսել: Հաստ աղիքում կամ հետանցքում առաջացած արյունը կարմիր է և թելի նման է: Եթե արնահոսել է աղեստամոքսային համակարգի ավելի վերին հատվածներում, ապա արյունը կլինի ավելի մուգ ՝ շագանակագույն, սև և այլն, և խառնված կլինի կղանքի հետ:
Երեխայի կղանքում արյան տարածված պատճառները
- Ամենատարածված պատճառը, թերևս, դեֆեկացիայի ժամանակ աղիների քերծվելն է, որի դեպքում արյան հետքը նման է թելի կամ բարակ շերտի, իսկ արյունը շաղախված չէ կղանքի մեջ:
- Մեկ այլ տարածված պատճառ է սննդային ալերգիան: Ամենատարածված ալերգենը կովի կաթից պատրաստված կաթնամթերքն է և սոյան: Մանրամասների համար կարդացեք մեր “Կրծքով կերակրվող երեխաների զգայունությունը կաթնամթերքի և այլ սննդամթերքի նկատմամբ” հոդվածը:
- Երրորդ ամենատարածված պատճառը կերակրող մոր ճաքած պտուկներն են. կրծքով կերակրվելիս երեխան կարող է մի փոքր արյուն կուլ տալ, որը դուրս կգա կղանքով: Սա վտանգավոր չէ երեխայի համար: Մանրամասների համար կարդացեք մեր “Ժանգոտած խողավակի սինդրոմը և արյունոտ կաթի այլ պատճառները” հոդվածը:
- Կաթի գերառաջարկը ևս կարող է կղանքում արյան պատճառ դառնալ: Որոշ մանկաբույժներ նշել են, որ արյունոտ կղանքի խնդիրը վերացել է, երբ կարգավորվել է մոր կաթի գերառաջարկը: Նման դեպքերում կերակրելիս կարելի է կրծքի մերսումներ/սեղմումներ անել, որը կօգնի երեխային ավելի շատ հետին կաթ ստանալ: Ուժեղ արտահոսք և կաթի գերառաջարկ
- Եղել են դեպքեր, երբ երեխայի կղանքում արյուն և լորձ է հայտնաբերվել, երբ նա սկսել է վիտամիններ ընդունել, իսկ երբ դադարեցրել է խմելը, կղանքում այլևս արյուն չի եղել:
- Կղանքում արյուն կարող է առաջանալ նաև աղիքային ինֆեկցիայով պայմանավորված ժամանակավոր լակտազային անբավարարության պատճառով:
- Որոշ ինֆեկցիաներով (սալմոնելլա և Clostridium difficile) պայմանավորված լուծը կարող է առաջացնել արյունոտ կղանք: Կրծքով կերակրվող երեխաների մոտ այս ինֆեկցիաների ախտանիշները ավելի թույլ են, քանի որ կրծքի կաթը խոչընդոտում է բակտերիաների աճին:
- Որոշ կոլիտներ, աղիքների անանցանելիությունը կամ աղիքային այլ խանգարումներ ևս կարող են կղանքի մեջ արյան պատճառ դառնալ:
Արդյո՞ք կղանքում արյուն տեսնելիս պետք է շտապ օգնություն կանչել
Եթե երեխայի կղանքի մեջ արյուն կա, դրա մասին տեղյակ պահեք երեխայի մանկաբույժին: Հիվանդանոց գնալու մասին որոշում ընդունեք հետևելով երեխայի վարքին. եթե երեխան ուրախ է և առողջ է երևում, կապվեք մանկաբույժի հետ և այցելություն խնդրեք: Եթե երեխայի փորն է ցավում, կղանքում կա մեծ քանակությամբ արյուն, երեխան լուծ է, փսխում է և/կամ ջերմում, ապա ցանկալի է ավելի արագ օգնության դիմել: Եթե կղանքում արյան քանակը կայուն է կամ շատանում է, շաղախված է լորձի հետ, անհապաղ զնագահարեք երեխայի բժշկին:
Աղբյուրը՝ http://kellymom.com/health/baby-health/bloodystool/
Թարգմանեց՝ Քրիստինե Բարսեղյանը
1 thought on “Արյուն երեխայի կղանքի մեջ. ո՞րն է պատճառը”
Comments are closed.